ബെംഗളൂരു നഗരത്തെ പ്രശസ്ത വിനോദസഞ്ചാര കേന്ദ്രമായ ഗോവയുമായും രാജ്യത്തിന്റെ സാമ്പത്തിക തലസ്ഥാനമായ മുംബൈയുമായും ബന്ധിപ്പിക്കുന്ന രണ്ട് പുതിയ വന്ദേ ഭാരത് എക്സ്പ്രസ്സ് സര്‍വീസുകളാണ് രാജ്യത്ത് ഉടന്‍ ആരംഭിക്കുന്നത്. ഇതില്‍ പ്രകൃതിഭംഗി തുളുമ്പുന്ന പശ്ചിമഘട്ട മലനിരകളിലൂടെ കടന്നുപോകുന്ന ബെംഗളൂരു - ഗോവ ട്രെയിന്‍ യാത്രക്കാര്‍ക്ക് അതിവേഗത്തിലുള്ളതും ഒപ്പം മനോഹരവുമായ ഒരു യാത്രാനുഭവമായിരിക്കും സമ്മാനിക്കുകയെന്ന് റെയില്‍വേ അധികൃതര്‍ വ്യക്തമാക്കുന്നു.ചെന്നൈ ഐ.സി.എഫിന്റെ സാങ്കേതികവിദ്യ ഉപയോഗിച്ച് ബി.ഇ.എം.എല്‍ ആണ് ഈ രണ്ട് അത്യാധുനിക ട്രെയിനുകളും വികസിപ്പിച്ചെടുത്തിട്ടുള്ളത്.
യശ്വന്ത്പൂര്‍ - മഡ്ഗാവ് റൂട്ടിലോടുന്ന ബെംഗളൂരു - ഗോവ വന്ദേ ഭാരത് എക്സ്പ്രസ്സ്, പശ്ചിമഘട്ടത്തിലെ സക്ലേഷ്പുർ, സുബ്രഹ്മണ്യ റോഡ് സ്റ്റേഷനുകള്‍ക്കിടയിലുള്ള അതീവ മനോഹരമായ ഹരിതാഭമായ പാതയിലൂടെയാണ് കടന്നുപോകുന്നത്. മംഗളൂരു ജംഗ്ഷന്‍ വഴി സര്‍വീസ് നടത്തുന്ന ഈ ട്രെയിനിന് ഹസ്സന്‍, ഉഡുപ്പി, മുരുഡേശ്വര്‍, ഗോകര്‍ണ റോഡ്, കാര്‍വാര്‍ ഉള്‍പ്പെടെ പ്രധാനപ്പെട്ട 12 സ്റ്റോപ്പുകളുണ്ടാകും. ആഴ്ചയില്‍ ആറ് ദിവസമായിരിക്കും ഈ ട്രെയിന്‍ സര്‍വീസ് നടത്തുക. ട്രെയിന്‍ നമ്പര്‍ 26655 ബുധനാഴ്ച ഒഴികെയുള്ള ദിവസങ്ങളില്‍ രാവിലെ 07:35-ന് യശ്വന്ത്പൂരില്‍ നിന്ന് പുറപ്പെട്ട് 13 മണിക്കൂര്‍ 20 മിനിറ്റ് കൊണ്ട് രാത്രി 08:55-ന് മഡ്ഗാവിലെത്തും. മറുദിശയില്‍ ട്രെയിന്‍ നമ്പര്‍ 26656 വ്യാഴാഴ്ച ഒഴികെയുള്ള ദിവസങ്ങളില്‍ രാവിലെ 08:20-ന് മഡ്ഗാവില്‍ നിന്ന് പുറപ്പെട്ട് രാത്രി 09:15-ന് യശ്വന്ത്പൂരില്‍ തിരിച്ചെത്തും.
ഇതോടൊപ്പം തന്നെ രാജ്യത്തെ ആദ്യത്തെ വന്ദേ ഭാരത് സ്ലീപ്പര്‍ എക്സ്പ്രസ്സ് നവംബര്‍ 2 മുതല്‍ ബെംഗളൂരു - മുംബൈ റൂട്ടില്‍ ഔദ്യോഗികമായി ഓടിത്തുടങ്ങുമെന്നതാണ് മറ്റൊരു വലിയ സവിശേഷത. നവംബര്‍ 1-ന് ബെംഗളൂരുവില്‍ വെച്ച് ഇതിന്റെ ഉദ്ഘാടന സര്‍വീസ് ഫ്ലാഗ് ഓഫ് ചെയ്യും. രണ്ട് വന്‍നഗരങ്ങള്‍ക്കുമിടയിലുള്ള യാത്രാസമയം 16 മണിക്കൂറില്‍ താഴെയായി കുറയ്ക്കാന്‍ സഹായിക്കുന്ന ഈ ട്രെയിന്‍ ആഴ്ചയില്‍ ആറ് ദിവസമായിരിക്കും ഇരുവശങ്ങളിലേക്കും സര്‍വീസ് നടത്തുക. ഹുബ്ബള്ളി ഒഴിവാക്കി പോകുന്ന ഈ വന്ദേ ഭാരത് സ്ലീപ്പറിന് അനന്തപൂര്‍, റായ്ച്ചൂര്‍, സോലാപൂര്‍, കല്ല്യാണ്‍ തുടങ്ങിയ നഗരങ്ങളിലാണ് പ്രധാന സ്റ്റോപ്പുകള്‍ ക്രമീകരിച്ചിരിക്കുന്നത്. ബെംഗളൂരുവില്‍ നിന്ന് തിങ്കളാഴ്ചകളിലും മുംബൈയില്‍ നിന്ന് ചൊവ്വാഴ്ചകളിലും ഈ സര്‍വീസ് ഉണ്ടായിരിക്കില്ല. രാത്രി 10:00 മണിക്ക് SMVT ബെംഗളൂരുവില്‍ നിന്ന് പുറപ്പെടുന്ന ട്രെയിന്‍ പിറ്റേന്ന് ഉച്ചയ്ക്ക് 01:50-ന് മുംബൈ ചത്രപതി ശിവജി ടെര്‍മിനസില്‍ എത്തിച്ചേരും. മറുപാതയില്‍ രാത്രി 10:30-ന് മുംബൈയില്‍ നിന്ന് പുറപ്പെട്ട് പിറ്റേന്ന് ഉച്ചയ്ക്ക് 02:50-ന് ബെംഗളൂരുവിലും എത്തും. പുതിയ സര്‍വീസുകള്‍ ടൂറിസം മേഖലയ്ക്കും ഐടി പ്രൊഫഷണലുകള്‍ക്കും വന്‍ പ്രയോജനം ചെയ്യും.
Content Highlights: Two new Vande Bharat Express services are set to connect Bengaluru with Goa and Mumbai.The train will have 12 stops, including Hassan, Udupi, Murudeshwar, Gokarna Road and Karwar.